Շրջակա միջավայրի նորանշանակ նախարար Ռոմանոս Պետրոսյանն այսօր՝ առաջին աշխատանքային օրը տված հարցազրույցում ներկայացրեց, որ իր համար պաշտոնավարման մեկնարկի առաջնահերթ խնդիրներից մեկն է Սևանա լճի էկոհամակարգի վերականգնումը՝ կարճաժամկետ և երկարաժամկետ ռազմավարությամբ։ Նա հավելեց, որ շրջակա միջավայրի կառավարման առանցքային աշխատանքներից կլինի նաև լքված և ընթացիկ շահագործվող պոչամբարների ճիշտ կառավարումը։

Նախարար Պետրոսյանը նշեց, որ Ամուլսարի հարցի շուրջ կխոսի որոշակի շրջան պաշտոնավարելուց հետո, երբ լիարժեքորեն կծանոթանա փորձագիտական գնահատականներին, քննարկումներ կունենա և պատրաստ կլինի թափանցիկ զրույցի՝ բնապահպանների, շահագրգիռ կողմերի և ՀՀ քաղաքացու հետ։ Նա ընդգծեց, որ այնուամենայնիվ՝ Ամուլսարի հարցով իր տեսակետը խոշոր հաշվով չի կարող տարբերվել վարչապետի և կառավարության տեսակետից։

Նախարարը նշեց, որ կարևոր առաջնահերթություններից է նաև անտառածածկ տարածքների ապօրինի մասնավորեցման դեմ պայքարը՝ այդ տարածքները սեփականատերերից վերադարձնելու և պետականացման նպատակով, ինչպես նաև հետամուտ է լինելու անտառածածկ տարածքներում անտառֆոնդի հողերի վրա ապօրինի կառուցապատումներին ու հողազավթումներին։

Ռոմանոս Պետրոսյանի գնահատմամբ՝ այս ոլորտում նոր կառավարության շոշափելի ձեռքբերումներից են.

• նախկին օլիգարխիկ շրջանակների մասնավոր գազանանոցների կենդանիների վերադարձը վայրի բնություն,
• Խոսրովի և մյուս արգելոցնելում բացառվել է որսագողությունը, բայց և անելիք շատ կա։

Նորանշանակ նախարարը նշեց, որ բնապահպանների և բնապահպանական կառույցների հետ հարաբերություններում տրամադրված է պարզ, շիտակ, ազնիվ, ուղիղ երկխոսության ու համագործակցության։

Նվարդ Մելիքյան