Այսօր «Հայրենիք», «Բարգավաճ Հայաստան» և «Հայ Յեղափոխական Դաշնակցություն» կուսակցությունները հանցագործության մասին հաղորդում ներկայացրեցին ՀՀ գլխավոր դատախազություն՝ պահանջելով քրեական գործ հարուցել օրենսդիր իշխանության ներկայացուցիչների և բարձրադիր պաշտոնատար այլ անձանց հանցակցությամբ առանձնապես ծանր հանցանքներ կատարելու փաստերի առթիվ։

«Հանցագործության մասին հաղորդումը ներառում է այս երկու տարիների ընթացքում նախաձեռնված և իրականացված ամբողջ գործընթացը։ Մասնավորապես մենք հիշում ենք, որ քաղաքական իշխանությունները կազմակերպված ձևով և խմբի կողմից Վահե Գրիգորյանին Սահմանադրական դատարանի դատավոր նշանակելու համար իրականացրեց բազմաթիվ գործողություններ։ Այդ թվում, եթե հիշում եք, օրենքի խախտում կար, որ երկրորդ անգամ չի կարելի ներկայացնել։ Բացի այդ, հետագայում, Վահե Գրիգորյանի կողմից Սահմանադրական դատարանի նախագահի ինքնահռչակումը և դրանից հետո, արդեն ձեզ հայտնի օրենքների փոփոխությունները, մասնավորապես՝ Սահմանադրական դատարանի դատավորների վաղ կենսաթոշակի ուղարկելու այդ ապօրինի օրենքը»,- լրագրողների հետ զրույցում մանրամասնում է «Հայրենիք» կուսակցության ներկայացուցիչ Արսեն Բաբայանը՝ հավելելով, որ չեն մոռացել նաև հարուցված բազմաթիվ քրեական գործերը՝ թե Սահմանադրական դատարանի նախագահի սանիկների հանդեպ, և թե ընդհանրապես ոստիկանական ճնշումները Սահմանադրական դատարանի դատավորների նկատմամբ։

Բաբայանը թվարկվածներին գումարում է Սահմանադրության վերջին փոփոխությունները և այսօր ԱԺ-ում կայանալիք արտահերթ նիստը, որի ընթացքում այսպես ասած իրենց «փնթի աշխատանքը» պետք է փորձեն սղագրել իմքայլականները, քանի որ Սահմանադրական դատարանի մասին Սահմանադրական օրենքում պետք է իրականացվի փոփոխություն, որը չի իրականացվել։

Նաիրա Զոհրաբյանը նշում է, որ համագործակցող ուժերն ակնկալում են Գլխավոր դատախազության ողջախոհությունը, քանի որ ներկայացված փաստերը առավել քան հիմնավոր են և անբեկանելի։

ՀՅԴ ներկայացուցիչը չվարանեց «զավթողական» անվանել անցած 1,5 տարվա վարված քաղաքականությունը դատարանների նկատմամբ, արդեն եղել են քաղաքական գնահատականներ տարբեր քաղաքական միավորների կողմից, որին հաջորդել են իրավական գնահատականները։

Քրիստինե Հովսեփյան