Իտալիայում ՀՀ դեսպանությունը հայտարարություն է տարածել, որով տեղեկացնում է, որ կիրակի օրը՝ մարտի 15-ին՝ Հռոմի ժամանակով ժամը 18:30-ին, հայկական «Atlantis EuropeanAirways» ավիաընկերության կողմից Հռոմի Ֆիումիչինո (Fiumicino Airport) օդանավակայանից կազմակերպվելու է չարթերային թռիչք դեպի Երևան ՀՀ այն քաղաքացիների համար, որոնք ներկայումս գտնվում են Իտալիայում և Հայաստան վերադառնալու ցանկություն են հայտնել:
Թռիչքի ընթացքում ուղևորներին կտրամադրվեն դիմակներ, կապահովվեն առողջապահական անվտանգության միջոցառումներ: Հայաստան վերադարձած ՀՀ քաղաքացիները կգտնվեն 14-օրյա կարանտինում:

«Հայտնում ենք, որ թռիչքի համար ՀՀ քաղաքացիների ցուցակագրման ընթացքում առաջնահերթությունը կտրվի հետևյալ սկզբունքով.

1. Կարճաժամկետ այցելությամբ Իտալիայում գտնվող ՀՀ քաղաքացիներ,
2. ուսման և գործուղման նպատակով Իտալիայում գտնվող ՀՀ քաղաքացիներ,
3. Իտալիայում կացության թույլտվություն ունեցող ՀՀ քաղաքացիներ:
Թռիչքի հնարավորությունից օգտվելու ցանկություն ունեցող ՀՀ այն քաղաքացիները, ովքեր դեռ կապ չեն հաստատել սույն դեսպանության հետ, խնդրում ենք անհապաղ տրամադրել ՀՀ քաղաքացու անձնագրի, մուտքի արտոնագրի կամ կացության թույլտվության պատճենները, կոնտակտային տվյալները (Իտալիայում գտնվելու նպատակ, հեռախոսի համար, էլեկտրոնային հասցե և Իտալիայում կեցության հասցե)։
Ֆիումիչինո օդանավակայան ժամանման և ուղևորների ցուցակագրման նպատակով դեսպանությունը կապ կհաստատի նախապես գրանցված ՀՀ քաղաքացիների հետ անհատապես։

Թեժ գիծ՝ +393775226710 կամ +393898296324,
+393423382875, +393442451433
Էլ. հասցե՝ armitalyembassy@mfa.am»,- տեղեկացրել է Իտալիայում ՀՀ դեսպանությունը: