Փաստաբան Էրիկ Ալեքսանյանի պաշտպան Զորայր Հարությունյանը հայտնել է, որ Ալեքսանյանի մոտից առգրավվել է էլեկտրոնային կրիչ հեռախոսը, որի վրա գրառված է տեղեկատվություն, այդ թվում՝ փաստաբանական գաղտնիք պարունակող:
«Սա նկատի ունենալով՝ արդեն չորս օր առաջ դիմել եմ նախաքննական մարմնին՝ փաստաբանական գաղտնիք պարունակող կրիչը անհապաղ վերադարձնելու պահանջով: Նշվածի վերաբերյալ մինչ օրս որևէ արձագանք ԱԱԾ-ից չի ստացվել: Նշվածը հանդիսանում է փաստաբանի անկախության վտանգ, ուղղակի ոտնահարում գործող օրենսդրության:
Փաստաբանությունը պետք է մնա անկախ, իսկ անկախությունը պետք է հարգվի պետական մարմինների կողմից: Հուսով եմ՝ շուտով նշված իրավիճակը կշտկվի, ու փաստաբանական գաղտնիք պարունակող առարկաները կվերադարձվեն, չնայած նրա, որ դա պետք է կատարվեր միջնորդությունը ստանալուց անմիջապես հետո»,- գրել է նա:
Նշենք՝ փաստաբան Էրիկ Ալեքսանյանը կալանավորվել էր հոկտեմբերի 19-ին:
Հիշեցնենք, որ նույն գործով մեղադրվում է և կալանավորվել է նաև դատավոր Արուսյակ Ալեքսանյանը:
Վարույթը, որի շրջանակներում կալանավորվել են փաստաբանը և դատավորը, վերաբերում է ՀՀ քրեական օրենսգրքի 441-րդ հոդվածի 2-րդ մասին (պաշտոնատար անձի՝ իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելը կամ լիազորություններն անցնելը)։
