ՀՀ կառավարությունը, Եվրասիական զարգացման բանկը (ԵԱԶԲ) և «Երեմյան ֆարմը» ստորագրել են համագործակցության ներդրումային համաձայնագիր, որի շրջանակում Եվրասիական զարգացման բանկը «Երեմյան փրոջեքթս» ընկերությունների խմբին կհատկացնի 25 մլն ԱՄՆ դոլար՝ արտադրության ամբողջական ցիկլի զարգացման համար: Նախատեսվում է քիչ արտադրողականությամբ կենդանիների փոխարինում ավելի բարձր արտադրողականությամբ կենդանիներով, կերային կուլտուրաների աճեցման համար գյուղատնտեսական տարածքների ընդլայնում և արդիականացում՝ մսամթերքի և կաթնամթերքի արտադրության մեծացում։
«Արմենպրես»-ի հաղորդմամբ՝ հուշագիրը ստորագրել են ՀՀ էկոնոմիկայի նախարար Վահան Քերոբյանը, ԵԱԶԲ խորհրդի նախագահ Նիկոլայ Պոդգուզովը և «Երեմյան Փրոջեքթս» ընկերության գլխավոր տնօրեն Դավիթ Երեմյանը։ Համագործակցության նպատակը ՀՀ-ում պարենային անվտանգության, գյուղատնտեսության և տնտեսական զարգացման ապահովումն է։
«Երեմյան փրոջեքթս» ընկերությունների խմբի կազմում գտնվող «Երեմյան ֆարմ»-ը ներդրումային այս ծրագրի շրջանակում կառուցելու է 1200 խոշոր եղջերավոր կենդանիների համար տավարաբուծական և 6000 գլուխ խոզերի համար խոզաբուծական ֆերմաներ։ Արդյունքում նախատեսվում է կաթի արտադրության ավելացում՝ մինչև 11000 տոննա, այսինքն տարեկան լրացուցիչ 1,6%։ Իր հերթին, սեփական կարողությունների զարգացումը կարող է նպաստել ներմուծման փոխարինմանը և 1,4%-ով բարելավել ՀՀ-ում կաթի մատակարարման մակարդակը (կաթի մատակարարման ներկա մակարդակը 82% է): ՀՀ էկոնոմիկայի նախարար Վահան Քերոբյանը շեշտեց, որ, գյուղատնտեսությունը առաջնային ուղղություն է և երկրի տնտեսության շարժիչ ուժը։
«Հաշվի առնելով այս գործոնները՝ մենք բարձր ենք գնահատում մեր գործընկերների հետ նոր համագործակցության հնարավորությունները։ Պիլոտային ծրագիրը, որը կիրականացվի ՀՀ կառավարության կողմից Եվրասիական զարգացման բանկի աջակցությամբ, միանշանակ, կդառնա ագրոարդյունաբերական համալիրի զարգացման նոր շրջափուլ, ինչպես նաև կնպաստի մեր երկրի մրցունակության բարձրացմանը։ Բացի այդ, ծրագիրը կաջակցի մասնավոր հատվածին, և վստահ եմ, որ կնպաստի արտահանման ներուժին։ Էկոնոմիկայի նախարարության անունից վստահեցնում եմ, որ մենք պատրաստակամ ենք ամեն կերպ աջակցել այս ծրագրի հաջող իրականացմանը»,-նշեց ՀՀ էկոնոմիկայի նախարար Վահան Քերոբյանը։
ԵԱԶԲ խորհրդի նախագահ Նիկոլայ Պոդգուզովը նշեց, որ «Երեմյան Փրոջեքթս» ընկերությունների խմբի հետ իրականացվող նախագիծն ուղղված է Հայաստանի Հանրապետության ագրոարդյունաբերական համալիրի ռազմավարական հատվածի զարգացմանը և ունենալու է էական տնտեսական ու սոցիալական ազդեցություն, ինչպիսին է գյուղական բնակավայրերի զարգացումը, որտեղ ապրում է Հայաստանի բնակչության 36%-ը: «300 նոր աշխատատեղերի ստեղծում, ՀՆԱ-ի աճ և բնակչությանը պահանջվող սննդամթերքով ապահովում։ Կառավարության հետ կնքված եռակողմ հուշագրի շնորհիվ մեր Բանկի աշխատանքը երկրում ագրոարդյունաբերական համալիրի զարգացման ուղղությամբ կհամակարգվի միանգամից երեք ուղղություններով՝ պետական անհրաժեշտություն – բիզնես շահեր – մատչելի ֆինանսավորման ապահովում»,- ասաց ԵԱԶԲ խորհրդի նախագահը։
Ըստ Դավիթ Երեմյանի՝ այս ծրագիրն աննախադեպ է ինչպես «Երեմյան Փրոջեքթս»-ի, այնպես էլ ՀՀ անասնապահության ոլորտի համար: «Այս ծրագրով մենք մեծ պատասխանատվություն ենք ստանձնում Հայաստանում ժամանակակից անասնաբուծության և կաթնամթերքի արտադրության նոր մշակույթ զարգացնելու, քանի որ ստեղծելու ենք վերջին սերնդի տեխնոլոգիաներով հագեցած ֆերմաներ։ Դրանով զարկ ենք տալու տավարաբուծության զարգացմանն ու վարակիչ օրինակ ենք լինելու մյուս ֆերմերային տնտեսությունների համար»,- ասաց Երեմյանը։
Վերջինս հույս հայտնեց, որ կարճ ժամանակում տեսանելի կլինեն այս ծրագրի արդյունքներն, ինչով կապացուցեն, որ Հայաստանում մրցակցային անասնապահություն և կաթնարտադրություն ունենալ հնարավոր է։
