ՀՀ վարչապետ Նիկոլ Փաշինյանն այսօր առցանց ասուլիսի ժամանակ հայտարարեց, թե ադրբեջանական կողմը փորձում է այնպիսի տպավորություն ստեղծել, թե հայկական կողմը դանդաղեցնում է սահմանագծման և սահմանազատման աշխատանքները:
«Նախորդ հանդիպումը տեղի է ունեցել Հայաստան-Ադրբեջան սահմանին, համատեղ որոշում է կայացվել, որ հաջորդ հանդիպումը տեղի կունենա Մոսկվայում՝ մեկ ամիս անց: Քանի որ կա աշխատանք, որը պետք է արվի, մեկ ամսից շուտ դա հնարավոր չէ անել: Սակայն Ադրբեջանի հայտարարությունների տեքստերից այնպիսի տպավորություն է, թե Հայաստանը խուսափում է այդ աշխատանքներին մասնակցել, բայց իրականում հակառակն է»,-ասաց ՀՀ վարչապետը:
Նրա խոսքով՝ նախնական համաձայնություն է եղել մեկնարկել սահմանազատման և սահմանային անվտանգության հարցերով համատեղ հանձնաժողովի նիստը, սակայն Ադրբեջանի կողմից 2 անգամ չեղարկվել ու հետաձգվել է:
«Նրանք կաթիլ-կաթիլ փորձում են կուտակել նոր պատերազմի լեգիտիմություն՝ ընդդեմ ՀՀ-ի ու Արցախի: Նույն էլ կոմունիկացիաների մասով, փորձում են ցույց տալ, թե Հայաստանը չի ցանկանում եռակող հայտարարության կետերն իրականացնել: Սակայն նրանց կարծիքով ձեռնտու է Հայաստանին պահել շրջափակման մեջ»:
Փաշինյանը նշեց, որ ադրբեջանական կողմի հետ չեն կարողանում լիարժեք համաձայնության գալ ճանապարհներ օգտագործման, սահմանների հատման իրավական ընթացակարգերի վերաբերյալ:
