Ուկրաինական պատերազմի ֆոնին բրիտանա-հոլանդական նավթագազային Shell ընկերությունը մտադիր է աստիճանաբար հրաժարվել ռուսական բոլոր ածխաջրածիններից՝ ներառյալ հում նավթը, նավթամթերքները, գազը և հեղուկ բնական գազը: Այս մասին հայտնել է Shell-ը։
Որպես առաջին քայլ, ընկերությունն անմիջապես կդադարեցնի ռուսական նավթի բոլոր տեղում գնումները և չի երկարաձգի պայմանագրերը, կփակի Ռուսաստանում իր գազալցակայանները, ինչպես նաև ավիացիոն վառելիքի և քսանյութերի արտադրությունը։
Համագործակցելով արևմտյան իշխանությունների հետ՝ Shell-ը կփոխի հում նավթի մատակարարման շղթան՝ դրանից դուրս թողնելով ռուսական հումքը։ Ինչպես նշել են ընկերությունում, այլընտրանքների որոնումը կարող է տևել մի քանի շաբաթ և հանգեցնել ընկերության մի շարք նավթավերամշակման գործարանների արտադրողականության նվազմանը։
«Մեր գործողությունները մինչ այժմ հիմնված են եղել կառավարությունների հետ շարունակական քննարկումների վրա՝ Ռուսաստանից էներգիայի մատակարարումներից ազատվելու անհրաժեշտության մասին՝ միաժամանակ պահպանելով էներգամատակարարումը», – ասել է Shell-ի գործադիր տնօրեն Բեն վան Բերդենը:
Նա ասել է, որ ռուսական սպառնալիքները՝ դադարեցնելու գազամուղի հոսքերը դեպի Եվրոպա, «ցույց են տալիս այն դժվար ընտրությունները և հնարավոր հետևանքները, որոնց մենք բախվում ենք, երբ մենք փորձում ենք դա անել»։
